کیف،19؍مارچ (ایس او نیوز؍ایجنسی) یوکرین کے صدر ولودیمیر زیلنسکی نے ہفتے کے روز کہا کہ روس کو اس کی غلطیوں سے پہنچنے والے نقصان کو کم کرنے کا واحد طریقہ مذاکرات ہی ہے ورنہ اسے ایسا نقصان اٹھانا پڑے گا کہ اس کے نتائج کئی نسلوں کو بھگتنا ہوں گے۔

ولودیمیر زیلینسکی نے ہفتے کے روز روسی صدر ولادیمیر پوتن کو ایک ویڈیو پیغام میں کہا کہ یہ وقت ہے کہ بغیر کسی تاخیر کے بات کی جائے۔ ولودیمیر زیلینسکی نے کہا کہ میں چاہتا ہوں کہ اس وقت ہر کوئی میری بات سنے، خاص طور پر ماسکو کے لوگ۔ یہ ملنے کا وقت ہے، یہ بات کرنے کا وقت ہے، یہ یوکرین کی علاقائی سالمیت اور انصاف کو بحال کرنے کا وقت ہے، ورنہ روس کو نقصان اٹھانا پڑے گا جس سے کئی نسلیں متاثر ہوں گی۔

انہوں نے کہا کہ روس کے ساتھ امن پر، ہمارے لیے سلامتی پر، یوکرین کے لیے بامعنی، منصفانہ اور بلا تاخیر مذاکرات ہونے چاہئیں۔ روس کے لیے اپنی غلطیوں سے ہونے والے نقصان کو کم کرنے کا واحد موقع مذاکرات کا ہے۔ ورنہ وہ ایسا نقصان اٹھائے گا کہ کئی نسلیں اس کا ازالہ نہیں کر سکیں گی۔ انہوں نے کہا کہ یوکرین میں سات انسانی راہداری ہیں، چھ سومی میں اور ایک ڈونیٹسک میں ہے۔

یوکرینی صدر نے کہا کہ اب تک 9000 سے زائد افراد بندرگاہی شہر ماریوپول چھوڑ کر محفوظ مقامات پر منتقل ہو چکے ہیں۔ روس نے کئی شہروں کو انسانی امداد کی فراہمی روک دی ہے۔ یہ مکمل طور پر سوچی سمجھی حکمت عملی ہے۔ انہوں نے ماریوپول میں تھیٹر پر حملے کے بارے میں کہا کہ ان میں سے کچھ شدید زخمی ہیں۔ لیکن ابھی تک مرنے والوں کے بارے میں کوئی اطلاع نہیں ہے۔

دی گارڈین نے صدر ولودیمیر زیلنسکی کے حوالے سے بتایا کہ روسی افواج ملک کے کئی علاقوں میں موجود ہیں، لیکن خارکیف کے علاقے میں خاص طور پر ایزیم کے قریب شدید لڑائی جاری ہے۔ انہوں نے کہا کہ وہ سوئٹزرلینڈ، اٹلی، اسرائیل اور جاپان سمیت عالمی رہنماؤں سے یوکرین میں امن کی اپیل کرتے رہیں گے۔